BFFood participa na feira Food4Future xunto a Clusaga, Bioga e 5 startups alimentarias

• BFFood, a aceleradora do sector alimentario dinamizada por Clusaga, participou en Food4Future, a principal feira de tecnoloxía alimentaria do norte de España

• A aceleradora participou nun stand compartido con Clusaga, Bioga e as startups alimentarias GradHoc, Mundo Healthy, Nigal, Tastelab e Las Jellys

Business Factory Food (BFFood), a aceleradora vertical do sector alimentario galego impulsada pola Xunta de Galicia e dinamizada polo Clúster Alimentario de Galicia (Clusaga) e empresas de referencia na industria alimentaria galega, participou en Food4Future, a maior feira de tecnoloxía alimentaria do norte de España, que este ano tivo lugar en Bilbao entre os días 16 e 18 de maio.

BFFood estivo presente na feira cun stand compartido con Clusaga e Bioga, así como cunha representación de startups alimentarias: GradHoc, Mundo Healthy, Nigal, Tastelab e Las Jellys. Estas empresas puideron presentar os seus produtos e contar cunha intensa axenda de networking cos asistentes á feira. Do mesmo xeito, as startups participaron como poñentes no FoodTech StartUp Forum, mostrando as súas propostas a investidores participantes.

Pola súa parte, Clusaga, ademais de acudir en virtude de entidade dinamizadora de BFFood, aproveitou para presentar o seu proxecto de aceleración a nivel europeo, Food-scalEUp. Esta iniciativa, coordinada polo Clúster e que implica un total de 10 organizacións de 5 países de Europa, pretende fomentar a capacidade dos ecosistemas rexionais europeos de innovación dixital agroalimentaria.

Proxectos finalistas dos Foodtech Innovation Awards

En paralelo, celebrouse a III Edición dos Foodtech Innovation Awards, uns premios que recoñecen ás empresas da industria de alimentación e bebidas que están impulsando a innovación e a dixitalización, e dos que resultaron finalistas dúas das empresas participantes no stand conxunto de BFFood.

En concreto, Mundo Healthy, spin-off da empresa socia de Clusaga Campomayor, foi finalista do premio AZTI á Alimentación Saudable con Wovo, a súa nova gama de produtos saudables desenvolvidos a partir de claras de ovo. Por outra parte, dentro da categoría Startup FoodTech mais innovadora, NIGAL resultou finalista con Libatio, o seu sistema integral para o monitoreo en tempo real da maduración do viño, composto por un tapón intelixente e unha plataforma web e móbil.

Sobre Food4Future 2023

Nesta edición de Food4Future participaron 8372 profesionais da alimentación e a tecnoloxía alimentaria procedentes de 34 países diferentes, contando cun total de 287 empresas que expuxeron os últimos avances tecnolóxicos que transformarán o sector da alimentación nos próximos anos. En paralelo á feira, no Food4Future World Summit, 413 expertos a nivel mundial debateron e analizaron o futuro do sector da alimentación e das bebidas, tomando como principais focos a Intelixencia Artificial, a economía circular, as proteínas alternativas e a nutrición personalizada.