Proxectos impulsados

Plataforma tecnolóxica que proporciona predicións agrícolas personalizadas a través de intelixencia artificial. Sen necesidade de hardware propio, permite anticiparse a riscos como xeadas, pragas ou desequilibrios hídricos, axudando a optimizar cultivos e decisións agronómicas.

Marca de conservas galegas que incorpora tecnoloxía QR para conectar cada produto coa súa orixe, receitas, contido audiovisual e experiencias turísticas. A súa proposta integra tradición, dixitalización e promoción territorial nun só modelo de negocio.

Fishnet é o primeiro canal online de comercialización de produtos da pesca conxelados de oportunidade, que axiliza a saída de stocks atasados transformándoos en oportunidades de negocio para un exclusivo club de comercializadores especializados. A través de ferramentas dixitais, conecta empresas do sector baixo principios de transparencia, información fiable, exclusividade e respecto aos tempos de negociación. O seu obxectivo é facer o sector máis sustentable reducindo o desperdicio alimentario, o tempo de almacenamento en cámara e os custos enerxéticos asociados.

Aposta pola valorización do peixe costeiro galego mediante procesos de liofilización. Esta técnica permite conservar as súas propiedades sen aditivos nin necesidade de frío, facilitando a súa comercialización en mercados gourmet e saudables, mesmo en destinos con barreiras loxísticas.

Proxecto para a produción de masa nai líquida e deshidratada elaborada con ingredientes galegos como castañas ou uvas. Aúna tradición panadeira e innovación tecnolóxica mediante un proceso de secado ao baleiro que mantén a súa actividade fermentativa.

Plataforma baseada en intelixencia artificial para a optimización preditiva da alimentación en explotacións de vacún leiteiro. Recolle e interpreta datos de campo para mellorar a eficiencia alimentaria, reducir o desperdicio e favorecer o benestar animal.

Desenvolvemento dun robot móbil asequible adaptado ao entorno das fábricas alimentarias. Estará deseñado para operar en espazos estreitos e húmidos, con materiais resistentes e rodas especiais, mellorando así a loxística interna e reducindo riscos operativos.

Liña de untables vexetais 100% plant-based, con alto contido proteico e longa vida útil sen refrixeración. Reinventa clásicos como a sobrasada ou o paté con ingredientes naturais, texturas cremosas e sabores intensos, pensados para un consumo flexible e saudable.

O proxecto Agrolink desenvolve unha gama de servizos para produtores agrarios a través da dixitalización completa do caderno de campo e a optimización do uso compartido da maquinaria, minorando os custos de produción e xerando un novo marketplace para produtores.

Este proxecto pretende desenvolver unha nova solución de envasado sustentable para o sector lácteo empregando papel creado a partir de subprodutos alimentarios que aumente a vida útil dos alimentos e a súa sustentabilidade.

O proxecto NIUFLY da empresa Beniu Soluciones, S.L. presenta solucións para o diagnóstico de cultivos e a aplicación de tratamentos fitosanitarios a través de drones.

Mediante modelos baseados en IA e xemeo dixital, Empromar implantará un novo sistema de predición de episodios tóxicos para a optimización nos tempos de resposta na industria do mexillón e os seus produtores.

FRUIWA é un novo refresco saudable en po envasado en sobres de 3 gramos con todo o sabor da froita e preparado para mesturar con medio litro de auga e obter a túa auga de froitas lista para beber. FRUIWA contén ademais ingredientes funcionais como Vitaminas C e D, Zinc, Magnesio e cepas de probióticos/posbióticos que axudan ás persoas con síndrome metabólico, resistencia á insulina ou con diabetes.

O proxecto IMPACT Upcycled Foods desenvolve produtos funcionais e upcycled mediante a revalorización dos subprodutos da industria alimentaria.

O proxecto Ntente achega unha nova solución de comunicación entre consumidor e fabricante, optimizando a experiencia de compra e maximizando a visibilidade das marcas, así como a súa localización nos diferentes puntos de venda.

Pastoral integra tecnoloxía de vangarda con agricultura rexenerativa para axudar aos agricultores a producir carne e lácteos de baixo carbono. Utilizando IoT e IA, permite implementar prácticas de pastoreo sustentables, monitorizar a saúde dos animais e medir con precisión os niveis de carbono no solo.

Este proxecto desenvolve novas solucións para combater o desperdicio alimentario a través da creación de novos canais de distribución dos excedentes de produción para a súa reintrodución nos canais de venda e chegada ao consumidor.

Simbiosis Acuícola é un proxecto da empresa Bioremed Algae, S.L. que propón o desenvolvemento dunha solución de cultivo de algas para combater a eutrofización das augas e obter compostos de elevado interese comercial para os sectores cosmético, farmacéutico e alimentario, entre outros.

Dispor dunha análise continua sobre o osíxeno disolto, os niveis de pH ou a turbidez da auga é esencial para lograr unha saúde e un crecemento óptimos das especies no medio mariño. O proxecto ACUIOT pretende monitorizar todos aqueles valores que contribúen a mellorar a produción acuícola. Grazas ao software do proxecto identifícanse patróns e xéranse coñecementos sobre comportamentos xerados ou que se poidan xerar no medio mariño, que incidan sobre o produto ou sobre a calidade das augas.

O proxecto ANFOOD de Logic Melt desenvolve un sistema de visión artificial plug & play que aprende automaticamente a detectar anomalías en imaxes de alimentos. A súa proposta de valor é que, coa súa ferramenta, calquera persoa sen coñecemento en intelixencia artificial pode utilizar un sistema de detección de corpos estraños de forma autónoma.

Verme Ditoso, a través do seu proxecto Biocrops, dedícase ao desenvolvemento e comercialización de abonos orgánicos procedentes do aproveitamento dun subproduto da cría da larva de Tenebrio Molitor ou “verme da fariña”, co obxectivo de mitigar o impacto do abuso dos agroquímicos na actividade agrícola. Debido ás súas propiedades fitofortificantes e ao tratarse dun produto seco e estable, de olor neutro, é ideal para plantacións no interior e no contorno das cidades. Actualmente, o produto comercialízase en puntos de venda físicos e online.

Recarbo ofrece unha solución integral para agricultura e gandería que permite xestionar as súas operacións de maneira eficiente e cumprir cos requisitos de sustentabilidade. Este proxecto favorece as prácticas responsables co entorno a través dunha plataforma sinxela e áxil orientada ao sector primario, facendo posible a xestión de procesos de forma automatizada e a sofisticación das explotacións ante os retos competitivos e ambientais.

Salmoira recupera o sabor da identidade gastronómica de Galicia: o da salgadura de mariscos e peixes das rías. Investiga o resultado de salgar, afumar e escabechar diferentes especies, con métodos de conservación altamente sustentables e gastronomicamente innovadores. No seu proceso de I+D ten dúas liñas máis de traballo: a da valorización gastronómica dos descartes e as mermas da industria.

Gradhoc é unha plataforma multiprotocolo de intelixencia artificial (IA) para a monitorización e xestión de activos, optimización e automatización de instalacións de refrixeración, con análise preventivo e preditivo. Os tres factores de diferenciación desta plataforma de IA son a optimización do consumo enerxético, as accións automáticas do mantemento de instalacións e a integración multiprotocolo e multifabricante.

Stock Management 4U é un software para a xestión de stocks de forma automatizada. A ferramenta realiza predicións de vendas a partir de datos históricos utilizando algoritmos de IA, diminuíndo así o impacto do aumento do prezo das materias primas e o grao de incerteza nos tempos de entrega. O software permitirá agrupar as referencias en base á frecuencia de venda e predicir o comportamento de cada unha delas, dixitalizando e automatizando os procesos de monitorización e análise a tempo real dos indicadores clave de stock e vendas.

Tofu Landeira baséase na produción de tofu artesanal nun obradoiro, ao que se une unha plantación de soia ecolóxica, ambos situados no rural galego. O seu obxectivo é pechar o ciclo produtivo, explotando a materia prima producida e revalorizando o rural con alternativas produtivas rendibles. A misión de Tofu Landeira, en liña coas tendencias respectuosas e sustentables a nivel social e ambiental, é a de procurar a innovación e o bo facer galego, creando un tofu artesán, nutritivo e saboroso a partir de soia ecolóxica.

O proxecto YowUp Milk nace en 2021 da man dun grupo de expertos no sector lácteo con ganas de crear un produto pioneiro. Tras este proxecto atópanse a compañía Dairypet, S.L. e a marca YowUp!, responsables da primeira gama de iogures de Europa sen graxa e sen lactosa, de longa vida e en ambiente, e con funcionalidades activas para cans e gatos.

Agro NM nace dentro de NEWMIND como un proxecto para o desenvolvemento dunha serie de ferramentas tecnolóxicas, tanto hardware como software, que permiten mellorar as prestacións do sector agroalimentario. A súa misión é universalizar a dixitalización en todo o sector agrario e gandeiro a un custo asumible por calquera profesional, transformando o sector primario a través da tecnoloxía e dos datos para optimizar a produción e mellorar a eficiencia e a calidade do produto.

Blue Marine Oil desenvolve aditivos e solucións solubles antibacterianas para empresas do sector da acuicultura, a partir de residuos oleosos mariños e aceites provenientes de peixes e outros organismos mariños, mediante o uso dunha tecnoloxía diferencial e en proceso de patente.

Code Contract é unha plataforma dixital para automatizar procesos cunha alta carga documental, coordinando participantes e centralizando todo o fluxo de información nun mesmo contorno e garantindo a transparencia e trazabilidade en todo momento. A plataforma está desenvolvida con tecnoloxía Blockchain que asegura a inmutabilidade da información.

Este proxecto permitirá a xeración dun novo aditivo alimentario a partir do cultivo de fungos sobre castañas, sendo unha nova solución biotecnolóxica que permitirá a diminución dos tempos de maduración de produtos lácteos e cárnicos, reducindo custos de produción dunha forma innovadora e sustentable.

Produción de Nano Celulosa Bacteriana (NBC) a partir de diferentes fontes e substratos ou residuos agroindustriais. A principal novidade deste proxecto é poder transformar un subproduto, que actualmente se desbota, nun nanomaterial, e que deste se poidan desenvolver aplicacións de alto impacto en alimentos como ingredientes nutracéuticos e en fitoterapéuticos en forma de apósitos e cosmética.

Proxecto procedente de Nigrán que ofrece servizos de diagnóstico fitopatolóxico asociado a especies fúnxicas e prescrición de tratamentos dos patóxenos diagnosticados con produtos sustentables, evitando o uso de fitosanitarios e promovendo o desenvolvemento de novos produtos a partir de microorganismos, extractos de plantas ou valorización de residuos.

O obxectivo principal do proxecto é avanzar no desenvolvemento do prototipo AONIR para transformalo nun produto viable e comercializable.

AONIR é unha plataforma baseada en espectroscopía do infravermello próximo para a caracterización en liña e en tempo real da produción alimentaria. Actualmente, realizouse un primeiro prototipo desta plataforma que se proba nunha industria láctea. A pesar dos prometedores resultados obtidos o prototipo precisa solucionar varios problemas, así como continuar coas probas en contornos reais antes de que o produto chegue ao mercado. Esta será a función de AOTECH GALICIA S.L. e para iso a empresa matriz ADVANCED OPTICAL TECHNOLOGIES transferiralle o coñecemento acumulado nas fases iniciais do proxecto.

Elaboración de bebidas a partir da fermentación dos azucres do soro da queixería especialmente dirixidas ao canal HORECA e Gran Distribución. ASUQUE supón unha innovación ao transformar un residuo (soro láctico) na materia prima para a creación de novos produtos alimentarios de alto valor engadido.

INOGANDO S.L. desenvolveu ELITER, unha plataforma certificadora de bovino lactante (ECBL) que permite a revalorización dos tenreiros das granxas leiteiras ante o seu comprador. ELITER, mediante o seu selo crotal acredita a orixe e os coidados que recibiron estes animais para mellorar a trazabilidade e comercialización destes. O obxectivo é incrementar a solución existente con sistemas blockchain que permitan incluír no proceso de acreditación entidades certificadoras de prestixio recoñecido e estender o modelo funcional a outras especies e sistemas produtivos.

Ghop é unha Startup dedicada á creación de tendas de conveniencia intelixentes sen necesidade de persoal, construídas cun espírito totalmente sustentable.
A súa construción modular está baseada na economía circular, principalmente, nunha estrutura de contedores marítimos xa usados, proporcionándolles así unha segunda vida útil e versatilidade á hora de seren transportados.

Mindsaic é unha plataforma para a creación de intelixencias artificiais (IAs) conversacionais completamente personalizables. Ditas IAs son capaces de manter conversas fluídas con usuarios e de disparar accións intelixentes sobre calquera infraestrutura tecnolóxica e humana do cliente, o que permite dixitalizar case calquera proceso comercial, industrial e/ou empresarial.

ODS Protein produce proteína alternativa a partir da fermentación do fungo Fusarium Veneratum, cunha formulación e textura idónea para ser incorporado como ingrediente a diferentes produtos da industria alimentaria.
O obxectivo do proxecto é conseguir unha primeira produción limitada que permita determinar os custos de produción da proteína e os seus requisitos tecnolóxicos e económicos para realizalo a gran escala.

É unha solución vertical de ciberseguridade para o sector agroalimentario. Esta solución concíbese como unha aplicación que proporciona un marco integral de seguridade xestionada cun enfoque 360º e que permite protexer calquera instalación agroalimentaria crítica.

Desenvolvemento e validación de Biopraedium Solar GreenHouse (BSG), unha unidade autónoma destinada á produción de alimento para gando e persoas mediante o emprego de tecnoloxías hidropónicas de cultivo, iluminación LED específica e sistema automatizado de sombra, co fin de optimizar e estabilizar a duración dos ciclos de crecemento dos vexetais. BSG facilita obter un maior número anual de colleitas, cun menor consumo de recursos naturais posible grazas ao emprego de sistemas sen terra e o total aproveitamento da luz solar.

Galinsect ten como obxectivo desenvolver a metodoloxía e infraestrutura para a cría de insectos que permita alcanzar un modelo estable de produción de: proteínas de alto valor engadido para o seu uso en alimentación; quitina e aceites esenciais para a industria farmacéutica; e abono orgánico de elevado aporte biolóxico.

Health in foods desenvolverá un innovador ingrediente bioactivo consistente nun  liposoma de DHA con extracto de cúrcuma alto en curcuminoides e colecalciferol (vitamina D3) que se poida incorporar en distintas matrices alimentarias achegando beneficios reais para a saúde do consumidor

Herooj desenvolverá unha completa gama de produtos e nutracéuticos especialmente orientados a deportistas de resistencia ou de alto rendemento. Os nosos hidroxeles, barriñas enerxéticas e bebidas hipertónicas e isotónicas elaboraranse a base de extractos de plantas con produción 100% ecolóxica e natural, e con base de auga de mar do océano Atlántico; podendo incorporar outros ingredientes naturais funcionais con propiedades antiinflamatorias e/ou de recuperación muscular.

Hk_coffee é un sistema IoT innovador na nube para o rexistro de información multiparamétrica do equipamento da industria alimentaria especialmente orientado ao canal Horeca. Hk_coffee facilita a xestión e garante a trazabilidade, a seguridade e a sustentabilidade dos produtos que operan no canal horeca, conectando en tempo real as marcas cos seus clientes.

Kiwanda Food é unha solución integral específica para o sector hortofrutícola para o control dixital baseado en sistemas RFID do proceso produtivo, dende a recollida en campo ata o despacho aos mercados, incluíndo o control intelixente dos procesos de almacenamento e maduración da froita.

SITRAV ATS é o acrónimo de Sistema de Trazabilidade Avanzado. Trátase dunha solución integral especialmente orientada ás empresas de procesado alimentario que garante unha xestión intelixente dos datos relacionados cos sistemas de produción industrial e un control visual da trazabilidade do mesmo. O sistema demostró a súa valía como solución de trazabilidade asociada aos procesos produtivos do sector pesqueiro e preténdese adaptalo ao sector industrial de derivados da pesca e procesado de alimentos.

Smart Vitamins busca adaptar a tecnoloxía de nanocápsulas bioactivas, desenvolvida na USC (Universidade de Santiago de Compostela), para a súa incorporación en matrices alimentarias e validar o efecto biolóxico e/ou terapéutico dunha emulsión das mesmas con compostos bioactivos cando estes son administrados por vía oral integradas en alimentos.

Plataforma virtual na nube alimentada a través de sistemas de Internet of Things (IoT) que permite replicar calquera planta física de fabricación en tempo real e optimizar os procesos de fabricación, mediante algoritmos de predición e prescrición, baseados en técnicas de analítica avanzada e aprendizaxe automática. O seu ámbito de aplicación é o curado de xamóns e a mellora da súa textura final.

Permite a certificación de forma inviolable da orixe dun produto para garantir con certeza a súa procedencia. Ademais, proporciona, mediante realidade aumentada explotable vía app en dispositivos móbiles, información atractiva para o cliente, que promociona o produto e as excelencias da súa orixe.

Desenvolvemento de novos produtos alimentarios e non alimentarios a partir de excedentes, transformándoos con tecnoloxía propia en produtos de alto valor engadido dirixidos á personalización das necesidades do consumidor e mantendo unha trazabilidade desde o seu cultivo ou produción ata o seu envase e entrega a cliente.

Plataforma de monitorización que permite a recollida de datos de calquera fonte, agregalos e analizalos en tempo real. A través de todo iso, establece alertas baseadas no histórico e accións automatizadas que facilitan ás empresas a optimización dos seus procesos e dos custos, tomando de forma áxil decisións informadas.

Ferramenta B2B en liña que facilita aos fabricantes europeos do sector alimentario a venda na China e a importadores chineses a compra en Europa. Mediante o uso de tecnoloxías big data, analytics, web scraping, business intelligence e metasearch engine proporciona un método organizado, completo e específico para facilitar a internacionalización nos mercados asiáticos.

Proxecto que permite de maneira gratuíta aos agricultores operar e xestionar os seus cultivos dunha maneira máis cómoda e eficiente. O sistema achega tres funcións principais: alertas de pragas e doenzas, información climatolóxica e caderno de campo dixital. Con ela ofrécese a posibilidade de dixitalizar calquera produción agrícola.