BFFood leva á FAO o modelo galego de aceleración de startups alimentarias

• Roberto Alonso, director de Clusaga, presentou Business Factory Food no World Food Forum de Roma, nunha sesión sobre o papel da transformación alimentaria no desenvolvemento das rexións.

Business Factory Food (BFFood), a aceleradora do sector alimentario de Galicia, impulsada pola Xunta de Galicia e dinamizada polo Clúster Alimentario de Galicia (Clusaga), participou no World Food Forum (WFF) 2026, o gran foro anual da FAO sobre a transformación dos sistemas agroalimentarios, celebrado na sede da organización en Roma.

Roberto Alonso, director de Clusaga, interveu na sesión “Rethinking Food Processing for Socioeconomic Gains”, organizada pola plataforma europea Smart Sensors 4 Agri-food (SS4AF), AgriFood Capital e BFFood/Clusaga. O debate virou arredor de como a innovación na transformación de alimentos pode xerar emprego, especialmente para os mozos, reforzar a resiliencia das rexións e contribuír á seguridade alimentaria.

• Do territorio á próxima xeración

Baixo o título “From land and sexa to the next generation”, Alonso presentou o caso galego: un sector alimentario ligado á terra, ao mar e á tradición, e que afronta retos como a crise climática, a remuda xeracional e a falta de man de obra. Ante eles, explicou como BFFood acompaña aos proxectos nas fases de incubación, aceleración e consolidación. Cada startup conta coa mentoría de empresas tractoras do sector, formación especializada e acceso a financiamento público. Desde 2021, a aceleradora impulsou 79 proxectos.

Na mesa redonda posterior, o director de Clusaga sinalou que o principal reto das startups alimentarias non é nacer, senón escalar, e defendeu o papel dos clústeres como ponte entre os emprendedores, a industria e as administracións: “As estratexias nacionais necesitan unha capa rexional para chegar ás pemes”.

• Unha presenza consolidada no foro da FAO

Esta participación dá continuidade á presenza de Clusaga no World Food Forum desde 2024, xunto á plataforma SS4AF, e reforza a proxección internacional de BFFood como modelo de colaboración público-privada para impulsar a innovación alimentaria e reter o talento no territorio.