A BFFood organiza un InfoDay Online para presentar as novidades da súa IX edición

•         A sesión terá lugar o 11 de setembro ás 13:00 horas

 A Business Factory Food (BFFood), programa de referencia en Galicia para a incubación, aceleración e consolidación de proxectos emprendedores innovadores no sector alimentario, organiza o vindeiro 11 de setembro ás 13:00 horas un InfoDay Online con motivo da apertura da convocatoria da súa IX edición.

O webinar ten como obxectivo presentar as principais novidades desta nova edición, explicar os detalles da convocatoria e dar a coñecer os recursos que a BFFood pon á disposición dos proxectos participantes. Ademais, as persoas asistentes poderán formular as súas dúbidas sobre o funcionamento do programa e o proceso de participación.

As inscricións para sumarse a este evento en línea están dispoñibles a través do formulario habilitado na páxina web da aceleradora.

•         Aberta a convocatoria da IX edición

A convocatoria da IX edición da BFFood está aberta desde o pasado 4 de agosto e busca impulsar proxectos emprendedores innovadores no ámbito alimentario, axudándoos a avanzar cara a modelos de negocio viables e escalables.

A través do programa, a BFFood conecta talento, industria e recursos estratéxicos, ofrecendo aos proxectos participantes un marco para desenvolver e validar as súas propostas e avanzar no seu crecemento.

As persoas emprendedoras interesadas xa poden presentar a súa candidatura a través do formulario dispoñible na web da BFFood. Os prazos de presentación de candidaturas varían en función da fase á que opte cada proxecto. Os que opten á fase de incubación poderán presentarse ata o 7 de outubro, mentres que os proxectos que opten á fase de consolidación poderán facelo ata o 17 de novembro.

•         Un programa de referencia para o emprendemento alimentario

A BFFood é a aceleradora de referencia en Galicia para o desenvolvemento de proxectos innovadores no sector alimentario. O programa está promovido pola Xunta de Galicia a través do Instituto Galego de Promoción Económica (IGAPE) e a Sociedad Gestora de Entidades de Inversión de Tipo Cerrado (XesGalicia), está coordinado polo Clúster Alimentario de Galicia (Clusaga) e conta co apoio de empresas líderes do sector. 

A IX edición dá así continuidade a unha iniciativa orientada a fomentar a innovación e o emprendemento alimentario, facilitando a conexión entre os novos proxectos e o tecido empresarial e favorecendo o desenvolvemento de solucións con potencial de crecemento.