Falamos con… Xavier Barra, promotor do proxecto Certo

Xavier Barra é o promotor de CERTO, unha das seis iniciativas seleccionadas na primeira edición de BFFood que está a ser mentorizada pola empresa tractora CLUN. Un mes despois do pitch day, falamos con el para que nos explique en que consiste o seu proxecto e para coñecer como están a ser os comezos na fase de aceleración de Business Factory Food. Isto é o que nos contou!

1. Por que decidistes presentarvos a BFFood?

Consideramos que é unha iniciativa moi interesante ao combinarse o apoio da Xunta de Galicia xunto ao do Clúster Alimentario de Galicia e ao haber unha implicación directa das empresas e a industria nos proxectos.

2. Como xurdiu a idea do voso proxecto?

Debido á nosa proximidade co sector alimentario e á extrapolación de necesidades doutros ámbitos a nivel global, detectamos a oportunidade de xerar un produto que permitise garantir a procedencia e autenticidade do produto, á vez que proporcionase información adicional ao consumidor.

3. Que achegades de novidoso ao sector?

A conexión do produtor co cliente final de forma simple e directa achegando valor engadido ao produto, mediante a trazabilidade e a garantía de autenticidade.

4. En BFFood contades con Pablo Gómez, director da división láctea de CLUN, como mentor, que vos achega?

Contar con Pablo como mentor é unha vantaxe significativa que achega éxito ao proxecto grazas ao seu coñecemento específico e detallado do sector.

5. A nivel xeral, que está a supoñer BFFood para vós e para o voso proxecto?

Unha oportunidade de ter acceso ao sector alimentario, ao que doutra forma sería imposible acceder, e de recibir unha formación imprescindible para operar dentro deste ámbito.

6. Como agardades que estea o voso proxecto cando remate o programa de aceleración de BFFood?

O noso obxectivo ao finalizar BFFood é ter un produto mínimo viable aprobado polo noso cliente e disposto para as probas de aplicación e vida correspondentes. Nunha segunda fase, implementaremos a etiqueta na liña de produción para saír ao mercado.

7. Por que recomendarías BFFood a outros emprendedores?

Pola oportunidade que ofrece de ter acceso ao sector, polo apoio de todo o equipo humano que forma BFFood e pola formación que se recibe durante todo o desenvolvemento do proxecto.

8. Por último, cal vos gustaría que fose o claim da vosa empresa e aquilo polo que vos vexan diferente ao resto de empresas?

O título do noso proxecto xa o di: CERTO. En castelán esta palabra significa seguro, fiable.