Coñecemos o proxecto Essence Food Technologies da man do seu CIO, Pablo López

Pablo López, Marcio Barradas e Ramón Suárez desenvolveron un proxecto que mantén a trazabilidade desde o cultivo ou produción ata o envasado e a entrega ao cliente, co obxectivo de garantir a sustentabilidade en todo o proceso. Presentáronse á primeira edición de BFFood para dar resposta ao reto de valoración de excedentes e foron unha das iniciativas seleccionadas.

Levan xa uns meses traballando na fase de aceleración, na que contan coa mentorización de Juanjo De la Cerda, director corporativo de I+D e calidade do Grupo Nueva Pescanova. Falamos con Pablo López, Chief Innovation Officer (CIO) de Essence Food Technologies para coñecer en detalle o proxecto.

• Que vos levou a presentarvos a BFFood?

O noso obxectivo era poder desenvolver nun contexto real un minimum viable product (MVP) que validase os nosos procesos e produtos en colaboración directa con empresas do sector da alimentación.

• Como xurdiu a idea dese produto mínimo viable do que falades?

Debido á nosa experiencia previa e ao noso interese por ofrecer solucións relacionadas coa alimentación sostible, que acheguen confianza e transparencia con blockchain, a partir de excedentes alimentarios, e con procesos de economía circular, xurdiu Essence Food Technologies.

• Dades resposta ao reto de valoración de excedentes formulado na primeira edición de BFFood; que tecnoloxías usades para o desenvolvemento do voso proxecto?

No noso proxecto traballamos con blockchain, secado por atomización, foodprinting e tecnoloxías habilitadoras da industria 4.0, tales como IoT, intelixencia artificial, big data, dixitalización avanzada, smart products…

• Formades parte da aceleradora da industria alimentaria galega; como definiriades o sector?

Vemos que é unha industria preocupada pola sostibilidade e polas tendencias de mercado, pero, á vez, centrada en modelos de negocio maduros que a levan a asumir poucos riscos e a limitar, así, a innovación.

• En BFFood contades cun mentor cunha dilatada traxectoria e experiencia no ámbito concreto do voso proxecto, como é Juanjo De la Cerda, director corporativo de I+D e calidade do Grupo Nueva Pescanova; que significa isto para vós?

É unha peza clave para acompañarnos en todo o camiño e axudarnos a axustar as nosas expectativas ao ritmo do mercado

• Creastes algún tipo de sinerxía co resto de participantes?

Si, tanto con algunhas empresas promotoras como con startups participantes en BFFood.

• Que obxectivo vos marcastes durante a vosa participación en BFFood?

Poder obter novos contratos para o produto mínimo viable que estamos a desenvolver, así como para os nosos servizos de I+D.

• Recomendariades BFFood a outros emprendedores?

Por suposto! Para nós un dos puntos fortes de BFFood é a posibilidade que nos ofrece de ter acceso ao contexto real do mercado.

• Por último, como vos gustaría que definisen o voso proxecto?

O obxectivo de Essence Food Technologies é facilitar a produción e o consumo responsable co obxectivo de vivir nun planeta sostible que posibilite unha alimentación intelixente con tecnoloxías avanzadas que garantan a esencia dos alimentos.