Cinco startups impulsadas en BFFood participan no demo day da Laconnetwork

A aceleradora Business Factory Food (BFFood) participará na décima Laconnetwork, o maior evento para emprendedores en Galicia que se celebrará os días 27 e 28 de maio de xeito online.

Baixo o título “Innovación e emprendemento, de incomprendidos a pioneiros”, o evento busca trasladar aos participantes o valor que se xerou ao longo dos seus dez anos de andaina. Para iso contará ao longo dos dous días de duración con diferentes mesas de debate, masterclasses e obradoiros.

Ademais, a Laconnetwork incluirá o xoves 27 de maio, de 10 a 19 horas, o Investors day. Nel as startups Ethical Farm Box, TOTALGAC food, Mindsaic, hk:coffee e REFIX, que foron impulsadas en diferentes edicións de BFFood, terán a oportunidade de presentar a súa iniciativa ante máis de 50 investidores do panorama nacional.

Neste demo day, cada proxecto disporá de cinco minutos para trasladar aos investidores as súas propostas de valor; así como, para convencelos da oportunidade de investimento que conlevan.

Ademais, haberá un xurado de investidores que terá asignada a función de seleccionar, de entre todos os proxectos propostos, aos dez finalistas do evento; cada un dos cales será agasallado cun premio. Este xurado tamén elixirá entre todas á mellor startup galega.

O responsable de BFFood, Javier A. Osuna, tamén participará neste encontro explicando, xunto ao resto das principais aceleradoras do panorama galego, os diferentes recursos e servizos que ofrece a aceleradora aos emprendedores con solucións innovadoras para o sector alimentario.