A VII edición da BFFood incorpora 14 proxectos á su fase de incubación

A BFFood continúa reforzando o seu compromiso co impulso do emprendemento no sector alimentario galego. Na súa sétima edición, 14 novos proxectos foron seleccionados para participar na fase de incubación, onde contarán co respaldo do ecosistema BFFood para desenvolver as súas propostas, validalas no mercado e escalar o seu impacto.

Se hai algo que destaca en todos eles é o seu alto compoñente innovador, a súa aliñación cos retos estratéxicos do sector e a súa forte vocación transformadora en áreas como a dixitalización, a sustentabilidade, a economía circular ou o desenvolvemento de novos produtos.

Agro4Data

Plataforma tecnolóxica que proporciona predicións agrícolas personalizadas a través de intelixencia artificial. Sen necesidade de hardware propio, permite anticiparse a riscos como xeadas, pragas ou desequilibrios hídricos, axudando a optimizar cultivos e decisións agronómicas.

Buy And Bye Analytics

Plataforma dual que conecta a consumidores e supermercados mediante unha app de listas da compra e un sistema de análise xeoespacial. Xera datos útiles para optimizar a experiencia de compra e a toma de decisións no canal retail.

Conservas Rumbo Norte

Marca de conservas galegas que incorpora tecnoloxía QR para conectar cada produto coa súa orixe, receitas, contido audiovisual e experiencias turísticas. A súa proposta integra tradición, dixitalización e promoción territorial nun único modelo de negocio.

Fishnet Expo

Primeira plataforma en liña para a comercialización de produtos da pesca conxelados de oportunidade. O seu obxectivo é reducir o desperdicio alimentario e mellorar a eficiencia loxística do sector pesqueiro, conectando vendedores e compradores mediante un sistema de membresías sen comisións de intermediación.

Gali.eCO2

Tecnoloxía de desinfección e esterilización baseada en CO2 supercrítico, que elimina microorganismos sen comprometer a calidade do alimento nin xerar residuos tóxicos. Ofrece unha solución segura, eficaz e sustentable para produtos e materiais de contacto alimentario.

impul.sos

Solución dixital que automatiza a recollida e análise de datos en pemes do sector alimentario, permitíndolles centrarse en tarefas estratéxicas e avanzar na sustentabilidade. Está deseñada especificamente para o tecido empresarial español, adaptándose ás súas particularidades e normativas.

INNOCOSTA

Aposta pola valorización do peixe costeiro galego mediante procesos de liofilización. Esta técnica permite conservar as súas propiedades sen aditivos nin necesidade de frío, facilitando a súa comercialización en mercados gourmet e saudables, mesmo en destinos con barreiras loxísticas.

LÉVEDO. Fermentando tradicións

Proxecto para a produción de masa nai líquida e deshidratada elaborada con ingredientes galegos como castañas ou uvas. Une tradición panadeira e innovación tecnolóxica mediante un proceso de secado ao baleiro que mantén a súa actividade fermentativa.

NPK & GAL

Tecnoloxía para recuperar nutrientes (nitróxeno, fósforo e potasio) de augas residuais gandeiras e transformalos en fertilizantes valorizables. Contribúe a reducir a contaminación por nitratos e a xerar ingresos adicionais para explotacións agrícolas e gandeiras.

Optimuu Nutrición

Plataforma baseada en intelixencia artificial para a optimización predictiva da alimentación en explotacións de vacún leiteiro. Recolle e interpreta datos de campo para mellorar a eficiencia alimentaria, reducir o desperdicio e favorecer o benestar animal.

PHOENIXFOODS

Desenvolve un sistema de bioconversión de residuos agroalimentarios mediante larvas de mosca soldado negra. O proceso xera fariña proteica para alimentación animal e fertilizantes naturais, impulsando así un modelo de economía circular con impacto ambiental positivo.

TOLA Natural Energy Drinks

Nova bebida enerxética galega que combina funcionalidade e sustentabilidade. Emprega ingredientes naturais como auga de manancial, extractos de froitas e lactosuero galego para crear unha alternativa saudable sen azucres engadidos nin aditivos, pensada para un público novo e consciente.

Troo4Food

Desenvolvemento dun robot móbil accesible adaptado ao entorno das fábricas alimentarias. Estará deseñado para operar en espazos estreitos e húmidos, con materiais resistentes e rodas especiais, mellorando así a loxística interna e reducindo riscos operativos.

Untables Vanetta

Liña de untables vexetais 100% plant-based, con alto contido proteico e longa vida útil sen refrixeración. Reinventa clásicos como a sobrasada ou o paté con ingredientes naturais, texturas cremosas e sabores intensos, pensados para un consumo flexible e saudable.

Todos estes proxectos iniciarán agora un proceso de incubación no que contarán cun programa formativo a cargo das tres universidades galegas, asesoramento estratéxico individualizado e networking. Unha nova xeración de talento que se suma ao ecosistema BFFood para seguir impulsando a innovación alimentaria desde Galicia.